Psalms 103

Bika nituꞌama yimvimba yizitisa Yave

Nkunga Davidi.

1Zitisa Yave, a muelꞌama ;
bibioso bidi mu minu bizitisa dizina diandi dinlongo.
2Zitisa Yave, a muelꞌama, ayi kadi zimbakana mamboti mandi moso kavanga.
3Niandi weti lemvukila masumu maku moso
ayi weti belusa minsongo miaku bioso.
4Niandi weti kula luzingu luaku mu dibulu ;
ayi niandi weti kuvuika luzolo ayi kiadi.
5Niandi weti yukutisa zitsatu ziaku mu bima bimboti
muingi bumuana buaku bukituka diaka bumona
banga buididi bu mbemba.
6Yave wumvanganga busonga
ayi bufuana mu diambu di batu boso beti yamusu.
7Wuzabikisa zinzila ziandi kuidi Moyize
mavanga mandi kuidi batu ba Iseli.
8Yave widi nkua kiadi ayi nkua nlemvo ;
kavika fuemanga ko, fulukidi mu luzolo.
9Niandi kafundanga ko mu zithangu zioso
ayi kalundanga ko nganzi andi mu zithangu zioso.
10Katu vangilanga ko boso buididi masumu meto,
katuvananga ko thumbudulu boso buididi mambimbi meto.
11Bila boso diyilu didi dizangama va yilu ntoto ;
buawu bobo luzolo luandi luidi lunneni
kuidi bobo beti kunkinzikanga.
12Boso esite katatukididi ayi wesite,
buawu bobo katutatudila zinzimbala zieto.
13Banga dise bu kamoninga bana bandi kiadi,
buawu bobo Yave kamoninga kiadi bobo beti kunkinzika.
14Bila zebi buevi tuvangulu
weti tebuka moyo ti tuidi mbungi-mbungi.
15Bila kuidi mutu, bilumbu biandi bidi banga biti ;
weti mona mamboti banga biteka bi tsola.
16Phemo yawu viokila va bidi, buna bisiedi ko
ayi buangu kibibedi kikadi buela kubitebukila moyo.
17Vayi mu kadika thangu ayi mu zithangu zioso
luzolo lu Yave luidi kuidi bobo beti kunkinzika
ayi busonga buandi kuidi bana ba bana bawu ;
18kuidi bobo beti keba Nguizani andi
ayi kuidi bobo bantebukilanga tumukina minsiku miandi.
19Yave wutula kundu kiandi ki kipfumu ku diyilu
ayi kipfumu kiandi kinyadila bima bioso.
20Luzitisa Yave beno zimbasi ziandi ;
beno makesa lueti vanga zithumunu ziandi,
lueti tumukina mambu mandi.
21Luzitisa Yave beno minkangu mi masodi mandi ma diyilu ;
beno bisadi biandi lueti vanganga luzolo luandi.
22Luzitisa Yave beno mavanga mandi moso,
mu bibuangu bioso biobi keti yadila.
Zitisa Yave, a muelꞌama.